Vinā assāsapassāsehi vitakkavicārānaṁ bhaṅgakkhaṇe tesaṁ vacīsaṅkhāro nirujjhati, no ca tesaṁ kāyasaṅkhāro nirujjhati. Paṭhamajjhānaṁ samāpannānaṁ kāmāvacarānaṁ assāsapassāsānaṁ bhaṅgakkhaṇe tesaṁ vacīsaṅkhāro ca nirujjhati kāyasaṅkhāro ca nirujjhati. Yassa kāyasaṅkhāro nirujjhati tassa cittasaṅkhāro nirujjhatīti? Āmantā. Yassa vā pana cittasaṅkhāro nirujjhati tassa kāyasaṅkhāro nirujjhatīti? Vinā assāsapassāsehi cittassa bhaṅgakkhaṇe tesaṁ cittasaṅkhāro nirujjhati, no ca tesaṁ kāyasaṅkhāro nirujjhati. Assāsapassāsānaṁ bhaṅgakkhaṇe tesaṁ cittasaṅkhāro ca nirujjhati kāyasaṅkhāro ca nirujjhati. Yassa vacīsaṅkhāro nirujjhati tassa cittasaṅkhāro nirujjhatīti? Āmantā. Yassa vā pana cittasaṅkhāro nirujjhati tassa vacīsaṅkhāro nirujjhatīti? Vinā vitakkavicārehi cittassa bhaṅgakkhaṇe tesaṁ cittasaṅkhāro nirujjhati, no ca tesaṁ vacīsaṅkhāro nirujjhati. Vitakkavicārānaṁ bhaṅgakkhaṇe tesaṁ cittasaṅkhāro ca nirujjhati vacīsaṅkhāro ca nirujjhati. 6.2.2.1.2. Anulomaokāsa Yattha kāyasaṅkhāro nirujjhati tattha vacīsaṅkhāro nirujjhatīti? …pe…. 6.2.2.1.3. Anulomapuggalokāsa Yassa yattha kāyasaṅkhāro nirujjhati tassa tattha vacīsaṅkhāro nirujjhatīti? …pe…. (Yassakampi yassayatthakampi sadisaṁ.) 6.2.2.1.4. Paccanīkapuggala