Sabbesaṁ cittassa uppādakkhaṇe vinā assāsapassāsehi cittassa bhaṅgakkhaṇe nirodhasamāpannānaṁ asaññasattānaṁ tesaṁ cittasaṅkhāro nirujjhissati, no ca tesaṁ kāyasaṅkhāro nirujjhati. Assāsapassāsānaṁ bhaṅgakkhaṇe tesaṁ cittasaṅkhāro ca nirujjhissati kāyasaṅkhāro ca nirujjhati. Yassa vacīsaṅkhāro nirujjhati tassa cittasaṅkhāro nirujjhissatīti? Savitakkasavicārapacchimacittassa bhaṅgakkhaṇe tesaṁ vacīsaṅkhāro nirujjhati, no ca tesaṁ cittasaṅkhāro nirujjhissati. Itaresaṁ vitakkavicārānaṁ bhaṅgakkhaṇe tesaṁ vacīsaṅkhāro ca nirujjhati cittasaṅkhāro ca nirujjhissati. Yassa vā pana cittasaṅkhāro nirujjhissati tassa vacīsaṅkhāro nirujjhatīti? Sabbesaṁ cittassa uppādakkhaṇe vinā vitakkavicārehi cittassa bhaṅgakkhaṇe nirodhasamāpannānaṁ asaññasattānaṁ tesaṁ cittasaṅkhāro nirujjhissati, no ca tesaṁ vacīsaṅkhāro nirujjhati. Vitakkavicārānaṁ bhaṅgakkhaṇe tesaṁ cittasaṅkhāro ca nirujjhissati vacīsaṅkhāro ca nirujjhati. 6.2.2.5.2. Anulomaokāsa Yattha kāyasaṅkhāro nirujjhati …pe…. 6.2.2.5.3. Anulomapuggalokāsa Yassa yattha kāyasaṅkhāro nirujjhati tassa tattha vacīsaṅkhāro nirujjhissatīti?