Yato kāmarāgānusayañca paṭighānusayañca mānānusayañca diṭṭhānusayañca vicikicchānusayañca bhavarāgānusayañca nappajahati tato avijjānusayaṁ nappajahatīti? Āmantā. Yato vā pana avijjānusayaṁ nappajahati tato kāmarāgānusayañca paṭighānusayañca mānānusayañca diṭṭhānusayañca vicikicchānusayañca bhavarāgānusayañca nappajahatīti? Āmantā. (Chakkamūlakaṁ.) 7.2.3.6. Paṭilomapuggalokāsa Yo yato kāmarāgānusayaṁ nappajahati so tato paṭighānusayaṁ nappajahatīti? Anāgāmimaggasamaṅgī dukkhāya vedanāya so tato kāmarāgānusayaṁ nappajahati, no ca so tato paṭighānusayaṁ nappajahati. Sveva puggalo rūpadhātuyā arūpadhātuyā apariyāpanne so tato kāmarāgānusayañca nappajahati paṭighānusayañca nappajahati. Anāgāmimaggasamaṅgiṁ ṭhapetvā avasesā puggalā sabbattha kāmarāgānusayañca nappajahanti paṭighānusayañca nappajahanti. Yo vā pana yato paṭighānusayaṁ nappajahati so tato kāmarāgānusayaṁ nappajahatīti? Anāgāmimaggasamaṅgī kāmadhātuyā dvīsu vedanāsu so tato paṭighānusayaṁ nappajahati, no ca so tato kāmarāgānusayaṁ nappajahati. Sveva puggalo rūpadhātuyā arūpadhātuyā apariyāpanne so tato paṭighānusayañca nappajahati kāmarāgānusayañca nappajahati. Anāgāmimaggasamaṅgiṁ ṭhapetvā avasesā puggalā sabbattha paṭighānusayañca nappajahanti kāmarāgānusayañca nappajahanti. Yo yato kāmarāgānusayaṁ nappajahati so tato mānānusayaṁ nappajahatīti?