Catunnaṁ puggalānaṁ kāmadhātuyā tīsu vedanāsu tesaṁ tattha avijjānusayo appahīno; bhavarāgānusayo na vattabbo “pahīno”ti vā “appahīno”ti vā. Tesaññeva puggalānaṁ rūpadhātuyā arūpadhātuyā tesaṁ tattha avijjānusayo ca appahīno bhavarāgānusayo ca appahīno. (Ekamūlakaṁ.) Yassa yattha kāmarāgānusayo ca paṭighānusayo ca appahīnā tassa tattha mānānusayo appahīnoti? Natthi. Yassa vā pana yattha mānānusayo appahīno tassa tattha kāmarāgānusayo ca paṭighānusayo ca appahīnāti? Anāgāmissa rūpadhātuyā arūpadhātuyā tassa tattha mānānusayo appahīno; kāmarāgānusayo ca paṭighānusayo ca na vattabbā “pahīnā”ti vā “appahīnā”ti vā. Tasseva puggalassa kāmadhātuyā dvīsu vedanāsu tassa tattha mānānusayo appahīno, no ca tassa tattha kāmarāgānusayo appahīno; paṭighānusayo na vattabbo “pahīno”ti vā “appahīno”ti vā. Tiṇṇaṁ puggalānaṁ rūpadhātuyā arūpadhātuyā tesaṁ tattha mānānusayo appahīno; kāmarāgānusayo ca paṭighānusayo ca na vattabbā “pahīnā”ti vā “appahīnā”ti vā. Tesaññeva puggalānaṁ kāmadhātuyā dvīsu vedanāsu tesaṁ tattha mānānusayo ca kāmarāgānusayo ca appahīnā; paṭighānusayo na vattabbo “pahīno”ti vā “appahīno”ti vā. Yassa yattha kāmarāgānusayo ca paṭighānusayo ca appahīnā tassa tattha diṭṭhānusayo …pe… vicikicchānusayo appahīnoti? Natthi. Yassa vā pana yattha vicikicchānusayo appahīno tassa tattha kāmarāgānusayo ca paṭighānusayo ca appahīnāti?