Yathāpi himavā brahme, pabbato gandhamādano; Nānārukkhehi sañchanno, mahābhūtagaṇālayo; Osadhehi ca dibbehi, disā bhāti pavāti ca. Evampi daharūpeto, paññāyogena sambhavo; Mā naṁ daharoti uññāsi, apucchitvāna sambhavaṁ; Pucchitvā sambhavaṁ jaññā, atthaṁ dhammañca brāhmaṇa. Yathāpi pāvako brahme, accimālī yasassimā; Jalamāno vane gacche, analo kaṇhavattanī. Ghatāsano dhūmaketu, uttamāhevanandaho; Nisīthe pabbataggasmiṁ, pahūtedho virocati. Evampi daharūpeto, paññāyogena sambhavo; Mā naṁ daharoti uññāsi, apucchitvāna sambhavaṁ; Pucchitvā sambhavaṁ jaññā, atthaṁ dhammañca brāhmaṇa. Javena bhadraṁ jānanti, balībaddañca vāhiye; Dohena dhenuṁ jānanti, bhāsamānañca paṇḍitaṁ. Evampi daharūpeto, paññāyogena sambhavo; Mā naṁ daharoti uññāsi, apucchitvāna sambhavaṁ; Pucchitvā sambhavaṁ jaññā, atthaṁ dhammañca brāhmaṇa”. Svādhippāgā bhāradvājo, sambhavassa upantikaṁ; Tamaddasa mahābrahmā, kīḷamānaṁ bahīpure.