“Mā bāliyaṁ vilapi na hissa tādisaṁ, Viḍayhase na hi labhase nisedhakaṁ; Āsajjasi gajamiva ekacārinaṁ, Yo taṁ padā naḷamiva pothayissatī”ti. Dutiyapalāyitajātakaṁ dasamaṁ. Kāsāvavaggo aṭṭhamo. Tassuddānaṁ Varavatthavaco dumakhīṇaphalaṁ, Caturodhammavaraṁ purisuttama; Dhaṅkamagadhā ca tayogirināma, Gajaggavaro dhajavarena dasāti. Dukanipāta Upāhanavagga

1. Upāhanajātaka

“Yathāpi kītā purisassupāhanā, Sukhassa atthāya dukhaṁ udabbahe; Ghammābhitattā thalasā papīḷitā, Tasseva pāde purisassa khādare.