Rūpāvacarānaṁ arūpāvacarānaṁ tesaṁ tattha dhammāyatanaṁ nirujjhissati, no ca tesaṁ tattha ghānāyatanaṁ nirujjhittha. Kāmāvacarānaṁ tesaṁ tattha dhammāyatanañca nirujjhissati ghānāyatanañca nirujjhittha. (Ghānāyatanamūlakaṁ.) Yassa yattha rūpāyatanaṁ nirujjhittha tassa tattha manāyatanaṁ nirujjhissatīti? Pañcavokāre parinibbantānaṁ asaññasattānaṁ tesaṁ tattha rūpāyatanaṁ nirujjhittha, no ca tesaṁ tattha manāyatanaṁ nirujjhissati. Itaresaṁ pañcavokārānaṁ tesaṁ tattha rūpāyatanañca nirujjhittha manāyatanañca nirujjhissati. Yassa vā pana yattha manāyatanaṁ nirujjhissati tassa tattha rūpāyatanaṁ nirujjhitthāti? Suddhāvāsaṁ upapajjantānaṁ arūpānaṁ tesaṁ tattha manāyatanaṁ nirujjhissati, no ca tesaṁ tattha rūpāyatanaṁ nirujjhittha. Itaresaṁ pañcavokārānaṁ tesaṁ tattha manāyatanañca nirujjhissati rūpāyatanañca nirujjhittha. Yassa yattha rūpāyatanaṁ nirujjhittha tassa tattha dhammāyatanaṁ nirujjhissatīti? Pañcavokāre parinibbantānaṁ tesaṁ tattha rūpāyatanaṁ nirujjhittha, no ca tesaṁ tattha dhammāyatanaṁ nirujjhissati. Itaresaṁ pañcavokārānaṁ asaññasattānaṁ tesaṁ tattha rūpāyatanañca nirujjhittha dhammāyatanañca nirujjhissati. Yassa vā pana yattha dhammāyatanaṁ nirujjhissati tassa tattha rūpāyatanaṁ nirujjhitthāti?