Yassa vā pana yattha bhavarāgānusayo nānuseti tassa tattha kāmarāgānusayo ca paṭighānusayo ca nānusentīti? Tiṇṇaṁ puggalānaṁ dukkhāya vedanāya tesaṁ tattha bhavarāgānusayo ca kāmarāgānusayo ca nānusenti, no ca tesaṁ tattha paṭighānusayo nānuseti. Tesaññeva puggalānaṁ kāmadhātuyā dvīsu vedanāsu tesaṁ tattha bhavarāgānusayo ca paṭighānusayo ca nānusenti, no ca tesaṁ tattha kāmarāgānusayo nānuseti. Tesaññeva puggalānaṁ apariyāpanne tesaṁ tattha bhavarāgānusayo ca nānuseti kāmarāgānusayo ca paṭighānusayo ca nānusenti. Arahato sabbattha …pe…. Yassa yattha kāmarāgānusayo ca paṭighānusayo ca nānusenti tassa tattha avijjānusayo nānusetīti? Tiṇṇaṁ puggalānaṁ rūpadhātuyā arūpadhātuyā tesaṁ tattha kāmarāgānusayo ca paṭighānusayo ca nānusenti, no ca tesaṁ tattha avijjānusayo nānuseti. Tesaññeva puggalānaṁ apariyāpanne tesaṁ tattha kāmarāgānusayo ca paṭighānusayo ca nānusenti avijjānusayo ca nānuseti. Anāgāmissa kāmadhātuyā tīsu vedanāsu rūpadhātuyā arūpadhātuyā tassa tattha kāmarāgānusayo ca paṭighānusayo ca nānusenti, no ca tassa tattha avijjānusayo nānuseti. Tasseva puggalassa apariyāpanne tassa tattha kāmarāgānusayo ca paṭighānusayo ca nānusenti avijjānusayo ca nānuseti. Arahato sabbattha …pe…. Yassa vā pana yattha avijjānusayo nānuseti tassa tattha kāmarāgānusayo ca paṭighānusayo ca nānusentīti? Āmantā. (Dukamūlakaṁ.)