Yo yato paṭighānusayaṁ nappajahati so tato bhavarāgānusayaṁ nappajahatīti? Aggamaggasamaṅgī rūpadhātuyā arūpadhātuyā so tato paṭighānusayaṁ nappajahati, no ca so tato bhavarāgānusayaṁ nappajahati. Sveva puggalo kāmadhātuyā tīsu vedanāsu apariyāpanne so tato paṭighānusayañca nappajahati bhavarāgānusayañca nappajahati. Dvinnaṁ maggasamaṅgīnaṁ ṭhapetvā avasesā puggalā sabbattha paṭighānusayañca nappajahanti bhavarāgānusayañca nappajahanti. Yo vā pana yato bhavarāgānusayaṁ nappajahati so tato paṭighānusayaṁ nappajahatīti? Anāgāmimaggasamaṅgī dukkhāya vedanāya so tato bhavarāgānusayaṁ nappajahati, no ca so tato paṭighānusayaṁ nappajahati. Sveva puggalo kāmadhātuyā dvīsu vedanāsu rūpadhātuyā arūpadhātuyā apariyāpanne so tato bhavarāgānusayañca nappajahati paṭighānusayañca nappajahati. Dvinnaṁ maggasamaṅgīnaṁ ṭhapetvā avasesā puggalā sabbattha bhavarāgānusayañca nappajahanti paṭighānusayañca nappajahanti. Yo yato paṭighānusayaṁ nappajahati so tato avijjānusayaṁ nappajahatīti? Aggamaggasamaṅgī kāmadhātuyā tīsu vedanāsu rūpadhātuyā arūpadhātuyā so tato paṭighānusayaṁ nappajahati, no ca so tato avijjānusayaṁ nappajahati. Sveva puggalo apariyāpanne so tato paṭighānusayañca nappajahati avijjānusayañca nappajahati. Dvinnaṁ maggasamaṅgīnaṁ ṭhapetvā avasesā puggalā sabbattha paṭighānusayañca nappajahanti avijjānusayañca nappajahanti.