Yo vā pana yato avijjānusayaṁ nappajahati so tato paṭighānusayaṁ nappajahatīti? Anāgāmimaggasamaṅgī dukkhāya vedanāya so tato avijjānusayaṁ nappajahati, no ca so tato paṭighānusayaṁ nappajahati. Sveva puggalo kāmadhātuyā dvīsu vedanāsu rūpadhātuyā arūpadhātuyā apariyāpanne so tato avijjānusayañca nappajahati paṭighānusayañca nappajahati. Dvinnaṁ maggasamaṅgīnaṁ ṭhapetvā avasesā puggalā sabbattha avijjānusayañca nappajahanti paṭighānusayañca nappajahanti. Yo yato mānānusayaṁ nappajahati so tato diṭṭhānusayaṁ …pe… vicikicchānusayaṁ nappajahatīti? Aṭṭhamako kāmadhātuyā tīsu vedanāsu rūpadhātuyā arūpadhātuyā so tato mānānusayaṁ nappajahati, no ca so tato vicikicchānusayaṁ nappajahati. Sveva puggalo apariyāpanne so tato mānānusayañca nappajahati vicikicchānusayañca nappajahati. Aggamaggasamaṅgiñca aṭṭhamakañca ṭhapetvā avasesā puggalā sabbattha mānānusayañca nappajahanti vicikicchānusayañca nappajahanti. Yo vā pana yato vicikicchānusayaṁ nappajahati so tato mānānusayaṁ nappajahatīti? Aggamaggasamaṅgī kāmadhātuyā dvīsu vedanāsu rūpadhātuyā arūpadhātuyā so tato vicikicchānusayaṁ nappajahati, no ca so tato mānānusayaṁ nappajahati. Sveva puggalo dukkhāya vedanāya apariyāpanne so tato vicikicchānusayañca nappajahati mānānusayañca nappajahati. Aggamaggasamaṅgiñca aṭṭhamakañca ṭhapetvā avasesā puggalā sabbattha vicikicchānusayañca nappajahanti mānānusayañca nappajahanti.