Yato vā pana avijjānusayaṁ na parijānāti tato kāmarāgānusayañca paṭighānusayañca mānānusayañca diṭṭhānusayañca vicikicchānusayañca bhavarāgānusayañca na parijānātīti? Āmantā. (Chakkamūlakaṁ.) 7.2.4.6. Paṭilomapuggalokāsa Yo yato kāmarāgānusayaṁ na parijānāti so tato paṭighānusayaṁ na parijānātīti? Anāgāmimaggasamaṅgī dukkhāya vedanāya so tato kāmarāgānusayaṁ na parijānāti, no ca so tato paṭighānusayaṁ na parijānāti. Sveva puggalo rūpadhātuyā arūpadhātuyā apariyāpanne so tato kāmarāgānusayañca na parijānāti paṭighānusayañca na parijānāti. Anāgāmimaggasamaṅgiṁ ṭhapetvā avasesā puggalā sabbattha kāmarāgānusayañca na parijānanti paṭighānusayañca na parijānanti. Yo vā pana yato paṭighānusayaṁ na parijānāti so tato kāmarāgānusayaṁ na parijānātīti? Anāgāmimaggasamaṅgī kāmadhātuyā dvīsu vedanāsu so tato paṭighānusayaṁ na parijānāti, no ca so tato kāmarāgānusayaṁ na parijānāti. Sveva puggalo rūpadhātuyā arūpadhātuyā apariyāpanne so tato paṭighānusayañca na parijānāti kāmarāgānusayañca na parijānāti. Anāgāmimaggasamaṅgiṁ ṭhapetvā avasesā puggalā sabbattha paṭighānusayañca na parijānanti kāmarāgānusayañca na parijānanti. Yo yato kāmarāgānusayaṁ na parijānāti so tato mānānusayaṁ na parijānātīti?