Yassa vā pana yattha avijjānusayo appahīno tassa tattha paṭighānusayo appahīnoti? Anāgāmissa kāmadhātuyā dvīsu vedanāsu rūpadhātuyā arūpadhātuyā tassa tattha avijjānusayo appahīno; paṭighānusayo na vattabbo “pahīno”ti vā “appahīno”ti vā. Tasseva puggalassa dukkhāya vedanāya tassa tattha avijjānusayo appahīno, no ca tassa tattha paṭighānusayo appahīno. Tiṇṇaṁ puggalānaṁ kāmadhātuyā dvīsu vedanāsu rūpadhātuyā arūpadhātuyā tesaṁ tattha avijjānusayo appahīno; paṭighānusayo na vattabbo “pahīno”ti vā “appahīno”ti vā. Tesaññeva puggalānaṁ dukkhāya vedanāya tesaṁ tattha avijjānusayo ca appahīno paṭighānusayo ca appahīno. Yassa yattha mānānusayo appahīno tassa tattha diṭṭhānusayo …pe… vicikicchānusayo appahīnoti? Tiṇṇaṁ puggalānaṁ kāmadhātuyā dvīsu vedanāsu rūpadhātuyā arūpadhātuyā tesaṁ tattha mānānusayo appahīno, no ca tesaṁ tattha vicikicchānusayo appahīno. Puthujjanassa kāmadhātuyā dvīsu vedanāsu rūpadhātuyā arūpadhātuyā tassa tattha mānānusayo ca appahīno vicikicchānusayo ca appahīno. Yassa vā pana yattha vicikicchānusayo appahīno tassa tattha mānānusayo appahīnoti?