“Dhammena ñāyena sugatte lacchasi, Eso hi dhammo na hi yācanā sudhā; Taṁ taṁ ayācantimahaṁ nimantaye, Sudhāya yañcicchasi tampi dammi te. Sā tvaṁ mayā ajja sakamhi assame, Nimantitā kañcanavelliviggahe; Tuvañhi me sabbarasehi pūjiyā, Taṁ pūjayitvāna sudhampi asniye”. Sā kosiyenānumatā jutīmatā, Addhā hiri rammaṁ pāvisi yassamaṁ; Udakavantaṁ phalamariyapūjitaṁ, Apāpasattūpanisevitaṁ sadā. Rukkhaggahānā bahukettha pupphitā, Ambā piyālā panasā ca kiṁsukā; Sobhañjanā loddamathopi padmakā, Kekā ca bhaṅgā tilakā supupphitā. Sālā karerī bahukettha jambuyo, Assatthanigrodhamadhukavetasā; Uddālakā pāṭali sinduvārakā, Manuññagandhā mucalindaketakā.