Tameva saṁsī punadeva mātaliṁ, Sahassanetto tidasānamindo; “Gantvāna vākyaṁ mama brūhi kosiyaṁ, ‘Āsāya saddhā siriyā ca kosiya; Hirī sudhaṁ kena malattha hetunā’”. Taṁ suplavatthaṁ udatārayī rathaṁ, Daddallamānaṁ upakāriyasādisaṁ; Jambonadīsaṁ tapaneyyasannibhaṁ, Alaṅkataṁ kañcanacittasannibhaṁ. Suvaṇṇacandettha bahū nipātitā, Hatthī gavāssā kikibyagghadīpiyo; Eṇeyyakā laṅghamayettha pakkhino, Migettha veḷuriyamayā yudhā yutā. Tatthassarājaharayo ayojayuṁ, Dasasatāni susunāgasādise; Alaṅkate kañcanajāluracchade, Āveḷine saddagame asaṅgite.