Taṁ tattha avacuṁ kaññā, dīghāvuṁ raṭṭhavaḍḍhanaṁ; “Kuhiṁ rājā anuppatto, ito rājā kuhiṁ gato”. “Paṅkaṁ rājā atikkanto, thale rājā patiṭṭhito; Akaṇṭakaṁ agahanaṁ, paṭipanno mahāpathaṁ. Ahañca paṭipannosmi, maggaṁ duggatigāminaṁ; Sakaṇṭakaṁ sagahanaṁ, yena gacchanti duggatiṁ”. “Tassa te svāgataṁ rāja, sīhasseva giribbajaṁ; Anusāsa mahārāja, tvaṁ no sabbāsamissaro”ti. Soṇakajātakaṁ paṭhamaṁ. Saṭṭhinipāta Soṇakavagga

2. Saṅkiccajātaka

Disvā nisinnaṁ rājānaṁ, brahmadattaṁ rathesabhaṁ; Athassa paṭivedesi, “yassāsi anukampako. Saṅkiccāyaṁ anuppatto, isīnaṁ sādhusammato; Taramānarūpo niyyāhi, khippaṁ passa mahesinaṁ”. Tato ca rājā taramāno, yuttamāruyha sandanaṁ; Mittāmaccaparibyūḷho, agamāsi rathesabho. Nikkhippa pañca kakudhāni, kāsīnaṁ raṭṭhavaḍḍhano; Vālabījanimuṇhīsaṁ, khaggaṁ chattañcupāhanaṁ.