Jaṭā ca tassa bhusadassaneyyā, Parosataṁ vellitaggā sugandhā; Dvedhā siro sādhu vibhattarūpo, Aho nu kho mayha tathā jaṭāssu. Yadā ca so pakirati tā jaṭāyo, Vaṇṇena gandhena upetarūpā; Nīluppalaṁ vātasameritaṁva, Tatheva saṁvāti panassamo ayaṁ. Paṅko ca tassa bhusadassaneyyo, Netādiso yādiso mayhaṁ kāye; So vāyatī erito mālutena, Vanaṁ yathā aggagimhe suphullaṁ. Nihanti so rukkhaphalaṁ pathabyā, Sucittarūpaṁ ruciraṁ dassaneyyaṁ; Khittañca tassa punareti hatthaṁ, Haṁ tāta kiṁrukkhaphalaṁ nu kho taṁ. Dantā ca tassa bhusadassaneyyā, Suddhā samā saṅkhavarūpapannā; Mano pasādenti vivariyamānā, Na hi nūna so sākamakhādi tehi.