“Ayañhi so āgato yaṁ tvamicchasi, Dhammena laddho mama dhammapālo; Taṁ passatha sammukhā bhāsamānaṁ, Sukho have sappurisehi saṅgamo”. Kāḷāgirikaṇḍaṁ nāma. “Adiṭṭhapubbaṁ disvāna, macco maccubhayaṭṭito; Byamhito nābhivādesi, nayidaṁ paññavatāmiva”. “Na camhi byamhito nāga, na ca maccubhayaṭṭito; Na vajjho abhivādeyya, vajjhaṁ vā nābhivādaye. Kathaṁ no abhivādeyya, abhivādāpayetha ve; Yaṁ naro hantumiccheyya, taṁ kammaṁ nupapajjati”. “Evametaṁ yathā brūsi, saccaṁ bhāsasi paṇḍita; Na vajjho abhivādeyya, vajjhaṁ vā nābhivādaye. Kathaṁ no abhivādeyya, abhivādāpayetha ve; Yaṁ naro hantumiccheyya, taṁ kammaṁ nupapajjati”. “Asassataṁ sassataṁ nu tavayidaṁ, Iddhī jutī balavīriyūpapatti; Pucchāmi taṁ nāgarājetamatthaṁ, Kathaṁ nu te laddhamidaṁ vimānaṁ. Adhiccaladdhaṁ pariṇāmajaṁ te, Sayaṅkataṁ udāhu devehi dinnaṁ; Akkhāhi me nāgarājetamatthaṁ, Yatheva te laddhamidaṁ vimānaṁ”.