Evaṁ mittavataṁ atthā, sabbe honti padakkhiṇā; Haṁsā yathā dhataraṭṭhā, ñātisaṅghaṁ upāgamunti. Cūḷahaṁsajātakaṁ paṭhamaṁ. Asītinipāta Cūḷahaṁsavagga

2. Mahāhaṁsajātaka

“Ete haṁsā pakkamanti, vakkaṅgā bhayameritā; Harittaca hemavaṇṇa, kāmaṁ sumukha pakkama. Ohāya maṁ ñātigaṇā, ekaṁ pāsavasaṁ gataṁ; Anapekkhamānā gacchanti, kiṁ eko avahīyasi. Pateva patataṁ seṭṭha, natthi baddhe sahāyatā; Mā anīghāya hāpesi, kāmaṁ sumukha pakkama”. “Nāhaṁ dukkhaparetopi, dhataraṭṭha tuvaṁ jahe; Jīvitaṁ maraṇaṁ vā me, tayā saddhiṁ bhavissati. Nāhaṁ dukkhaparetopi, dhataraṭṭha tuvaṁ jahe; Na maṁ anariyasaṁyutte, kamme yojetumarahasi. Sakumāro sakhā tyasmi, sacitte casmi te ṭhito; Ñāto senāpati tyāhaṁ, haṁsānaṁ pavaruttama. Kathaṁ ahaṁ vikatthissaṁ, ñātimajjhe ito gato; Taṁ hitvā patataṁ seṭṭha, kiṁ te vakkhāmito gato; Idha pāṇaṁ cajissāmi, nānariyaṁ kattumussahe”.