Yo brāhmaṇe bhojayi dīgharattaṁ, Annena pānena yathānubhāvaṁ; Pasannacitto anumodamāno, Subhoga devaññataro ahosi. Mahāsanaṁ devamanomavaṇṇaṁ, Yo sappinā asakkhi bhojetumaggiṁ; Sa yaññatantaṁ varato yajitvā, Dibbaṁ gatiṁ mucalindajjhagacchi. Mahānubhāvo vassasahassajīvī, Yo pabbajī dassaneyyo uḷāro; Hitvā apariyanta raṭṭhaṁ sasenaṁ, Rājā dudīpopi jagāma saggaṁ. Yo sāgarantaṁ sāgaro vijitvā, Yūpaṁ subhaṁ soṇṇamayaṁ uḷāraṁ; Ussesi vessānaramādahāno, Subhoga devaññataro ahosi. Yassānubhāvena subhoga gaṅgā, Pavattatha dadhisannisinnaṁ samuddaṁ; Salomapādo paricariya maggiṁ, Aṅgo sahassakkhapurajjhagacchi.