“Kuṇālohaṁ tadā āsiṁ, udāyī phussakokilo; Ānando gijjharājāsi, sāriputto ca nārado; Parisā buddhaparisā, evaṁ dhāretha jātakan”ti. Kuṇālajātakaṁ catutthaṁ. Asītinipāta Cūḷahaṁsavagga

5. Mahāsutasomajātaka

“Kasmā tuvaṁ rasaka edisāni, Karosi kammāni sudāruṇāni; Hanāsi itthī purise ca mūḷho, Maṁsassa hetu adu dhanassa kāraṇā”. “Na attahetū na dhanassa kāraṇā, Na puttadārassa sahāyañātinaṁ; Bhattā ca me bhagavā bhūmipālo, So khādati maṁsaṁ bhadantedisaṁ”. “Sace tuvaṁ bhatturatthe payutto, Karosi kammāni sudāruṇāni; Pātova antepuraṁ pāpuṇitvā, Lapeyyāsi me rājino sammukhe taṁ”.