Mano dantaṁ pathaṁ neti, samadantehi vāhibhi; Icchā lobho ca kummaggo, ujumaggo ca saṁyamo. Rūpe sadde rase gandhe, vāhanassa padhāvato; Paññā ākoṭanī rāja, tattha attāva sārathi. Sace etena yānena, samacariyā daḷhā dhiti; Sabbakāmaduho rāja, na jātu nirayaṁ vaje”. “Alāto devadattosi, sunāmo āsi bhaddaji; Vijayo sāriputtosi, moggallānosi bījako. Sunakkhatto licchaviputto, guṇo āsi acelako; Ānando sā rucā āsi, yā rājānaṁ pasādayi. Uruvelakassapo rājā, pāpadiṭṭhi tadā ahu; Mahābrahmā bodhisatto, evaṁ dhāretha jātakan”ti. Mahānāradakassapajātakaṁ aṭṭhamaṁ. Mahānipāta Mūgapakkhavagga Vidhurajātaka 1 Dohaḷakaṇḍa “Paṇḍu kisiyāsi dubbalā, Vaṇṇarūpaṁ natavedisaṁ pure; Vimale akkhāhi pucchitā, Kīdisī tuyhaṁ sarīravedanā”.