“Ajeyyamesā tava hotu metti, Bhariyāya kaccāna piyāya saddhiṁ; Ānandi vitto sumano patīto, Datvā maṇiṁ mañca nayindapatthaṁ”. Sa puṇṇako kurūnaṁ kattuseṭṭhaṁ, Nisīdayī purato āsanasmiṁ; Ādāya kattāramanomapaññaṁ, Upānayī nagaraṁ indapatthaṁ. Mano manussassa yathāpi gacche, Tatopissa khippataraṁ ahosi; Sa puṇṇako kurūnaṁ kattuseṭṭhaṁ, Upānayī nagaraṁ indapatthaṁ. “Etindapatthaṁ nagaraṁ padissati, Rammāni ca ambavanāni bhāgaso; Ahañca bhariyāya samaṅgibhūto, Tuvañca pattosi sakaṁ niketaṁ”.