Itthaṁ sudaṁ āyasmā pupphathūpiyo thero imā gāthāyo abhāsitthāti. Pupphathūpiyattherassāpadānaṁ dutiyaṁ. Sereyyavagga 3 Pāyasadāyakattheraapadāna “Suvaṇṇavaṇṇo sambuddho, Bāttiṁsavaralakkhaṇo; Pavanā abhinikkhanto, Bhikkhusaṅghapurakkhato. Mahaccā kaṁsapātiyā, vaḍḍhetvā pāyasaṁ ahaṁ; Āhutiṁ yiṭṭhukāmo so, upanesiṁ baliṁ ahaṁ. Bhagavā tamhi samaye, lokajeṭṭho narāsabho; Caṅkamaṁ susamārūḷho, ambare anilāyane. Tañca acchariyaṁ disvā, abbhutaṁ lomahaṁsanaṁ; Ṭhapayitvā kaṁsapātiṁ, vipassiṁ abhivādayiṁ. Tuvaṁ devosi sabbaññū, sadeve sahamānuse; Anukampaṁ upādāya, paṭigaṇha mahāmuni. Paṭiggahesi bhagavā, sabbaññū lokanāyako; Mama saṅkappamaññāya, satthā loke mahāmuni. Ekanavutito kappe, yaṁ dānamadadiṁ tadā; Duggatiṁ nābhijānāmi, pāyasassa idaṁ phalaṁ. Ekatālīsito kappe, buddho nāmāsi khattiyo; Sattaratanasampanno, cakkavattī mahabbalo.