Kaṇikāro hatthidado, ālambaṇudakāsanaṁ; Tuvaraṁ thomako ceva, ukkhepaṁ sīsupadhānaṁ. Paṇṇado citapūjī ca, gāthāyo ceva sabbaso; Cattāri ca satānīha, ekapaññāsameva ca. Pañcavīsasatā sabbā, dvāsattati taduttari; Tisataṁ apadānānaṁ, gaṇitā atthadassibhi. Kaṇikāravaggadasakaṁ. Tatiyasatakaṁ samattaṁ. Padumakesaravagga Padumakesariyattheraapadāna “Isisaṅghe ahaṁ pubbe, āsiṁ mātaṅgavāraṇo; Mahesīnaṁ pasādena, padmakesaramokiriṁ. Paccekajinaseṭṭhesu, dhutarāgesu tādisu; Tesu cittaṁ pasādetvā, kappaṁ saggamhi modahaṁ. Ekanavutito kappe, kesaraṁ okiriṁ tadā; Duggatiṁ nābhijānāmi, buddhapūjāyidaṁ phalaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.