‘Mā no pamattā assumha, appamattā sadevakā; Mayampi thūpaṁ kassāma, lokanāthassa tādino; Ratanehi chādessāma, āyataṁ buddhacetiyaṁ’. Yojanaṁ tepi vaḍḍhesuṁ, āyataṁ buddhacetiyaṁ; Pañcayojanamubbiddho, thūpo obhāsate tadā. Yakkhā tattha samāgantvā, ekato mantayuṁ tadā; Manussā devā nāgā ca, garuḷā kumbhaaṇḍakā. Paccekaṁ buddhaseṭṭhassa, akaṁsu thūpamuttamaṁ; ‘Mā no pamattā assumha, appamattā sadevakā. Mayampi thūpaṁ kassāma, lokanāthassa tādino; Phalikāhi chādessāma, āyataṁ buddhacetiyaṁ’. Yojanaṁ tepi vaḍḍhesuṁ, āyataṁ buddhacetiyaṁ; Cha yojanāni ubbiddho, thūpo obhāsate tadā. Gandhabbā ca samāgantvā, ekato mantayuṁ tadā; ‘Manujā devatā nāgā, garuḷā kumbhayakkhakā. Sabbekaṁsu buddhathūpaṁ, mayamettha akārakā; Mayampi thūpaṁ kassāma, lokanāthassa tādino’. Vediyo satta katvāna, chattamāropayiṁsu te; Sabbasoṇṇamayaṁ thūpaṁ, gandhabbā kārayuṁ tadā. Sattayojanamubbiddho, thūpo obhāsate tadā; Rattindivā na ñāyanti, āloko hoti sabbadā.