Mandāravañca kakkāru, bhisakesarapupphiyo; Aṅkolako kadambī ca, uddālī ekacampako; Timiraṁ saḷalañceva, gāthā tālīsameva ca. Bodhivandanavagga Bodhivandakattheraapadāna “Pāṭaliṁ haritaṁ disvā, pādapaṁ dharaṇīruhaṁ; Ekaṁsaṁ añjaliṁ katvā, avandiṁ pāṭaliṁ ahaṁ. Añjaliṁ paggahetvāna, garuṁ katvāna mānasaṁ; Antosuddhaṁ bahisuddhaṁ, suvimuttamanāsavaṁ. Vipassiṁ lokamahitaṁ, karuṇāñāṇasāgaraṁ; Sammukhā viya sambuddhaṁ, avandiṁ pāṭaliṁ ahaṁ. Ekanavutito kappe, yaṁ bodhimabhivandahaṁ; Duggatiṁ nābhijānāmi, vandanāya idaṁ phalaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā bodhivandako thero imā gāthāyo abhāsitthāti. Bodhivandakattherassāpadānaṁ paṭhamaṁ. Bodhivandanavagga Pāṭalipupphiyattheraapadāna