Aho buddhā aho dhammā, aho no satthu sampadā; Duggatiṁ nābhijānāmi, thūpapūjāyidaṁ phalaṁ. Catunnavutito kappe, thūpasīkhasanāmakā; Soḷasāsiṁsu rājāno, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā thambhāropako thero imā gāthāyo abhāsitthāti. Thambhāropakattherassāpadānaṁ dutiyaṁ. Chattavagga Vedikārakattheraapadāna “Nibbute lokanāthamhi, piyadassīnaruttame; Pasannacitto sumano, muttāvedimakāsahaṁ. Maṇīhi parivāretvā, akāsiṁ vedimuttamaṁ; Vedikāya mahaṁ katvā, tattha kālaṅkato ahaṁ. Yaṁ yaṁ yonupapajjāmi, devattaṁ atha mānusaṁ; Maṇī dhārenti ākāse, puññakammassidaṁ phalaṁ. Soḷaseto kappasate, maṇippabhāsanāmakā; Chattiṁsāsiṁsu rājāno, cakkavattī mahabbalā.