Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā panasaphaladāyako thero imā gāthāyo abhāsitthāti. Panasaphaladāyakattherassāpadānaṁ aṭṭhamaṁ. Avaṭaphalavagga 9 Soṇakoṭivīsattheraapadāna “Vipassino pāvacane, ekaṁ leṇaṁ mayā kataṁ; Cātuddisassa saṅghassa, bandhumārājadhāniyā. Dussehi bhūmiṁ leṇassa, santharitvā pariccajiṁ; Udaggacitto sumano, akāsiṁ paṇidhiṁ tadā. Ārādhayeyyaṁ sambuddhaṁ, pabbajjañca labheyyahaṁ; Anuttarañca nibbānaṁ, phuseyyaṁ santimuttamaṁ. Teneva sukkamūlena, kappe navuti saṁsariṁ; Devabhūto manusso ca, katapuñño virocahaṁ.