Itthaṁ sudaṁ āyasmā bhikkhadāyako thero imā gāthāyo abhāsitthāti. Bhikkhadāyakattherassāpadānaṁ paṭhamaṁ. Bhikkhadāyivagga 2 Ñāṇasaññikattheraapadāna “Suvaṇṇavaṇṇaṁ sambuddhaṁ, Nisabhājāniyaṁ yathā; Tidhāpabhinnaṁ mātaṅgaṁ, Kuñjaraṁva mahesinaṁ. Obhāsentaṁ disā sabbā, uḷurājaṁva pūritaṁ; Rathiyaṁ paṭipajjantaṁ, lokajeṭṭhaṁ apassahaṁ. Ñāṇe cittaṁ pasādetvā, paggahetvāna añjaliṁ; Pasannacitto sumano, siddhatthamabhivādayiṁ. Catunnavutito kappe, yaṁ kammamakariṁ tadā; Duggatiṁ nābhijānāmi, ñāṇasaññāyidaṁ phalaṁ. Tesattatimhito kappe, soḷasāsuṁ naruttamā; Sattaratanasampannā, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā ñāṇasaññiko thero imā gāthāyo abhāsitthāti. Ñāṇasaññikattherassāpadānaṁ dutiyaṁ. Bhikkhadāyivagga Uppalahatthiyattheraapadāna