Satasahassito kappe, yaṁ kammamakariṁ tadā; Duggatiṁ nābhijānāmi, buddhapūjāyidaṁ phalaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā ekapadumiyo thero imā gāthāyo abhāsitthāti. Ekapadumiyattherassāpadānaṁ paṭhamaṁ. Ekapadumiyavagga 2 Tīṇuppalamāliyattheraapadāna “Candabhāgānadītīre, ahosiṁ vānaro tadā; Addasaṁ virajaṁ buddhaṁ, nisinnaṁ pabbatantare. Obhāsentaṁ disā sabbā, sālarājaṁva phullitaṁ; Lakkhaṇabyañjanūpetaṁ, disvā attamano ahuṁ. Udaggacitto sumano, pītiyā haṭṭhamānaso; Tīṇi uppalapupphāni, matthake abhiropayiṁ. Pupphāni abhiropetvā, vipassissa mahesino; Sagāravo bhavitvāna, pakkāmiṁ uttarāmukho. Gacchanto paṭikuṭiko, vippasannena cetasā; Selantare patitvāna, pāpuṇiṁ jīvitakkhayaṁ.