“Vijjādharo tadā āsiṁ, himavantamhi pabbate; Addasaṁ virajaṁ buddhaṁ, caṅkamantaṁ mahāyasaṁ. Tīṇi kesarapupphāni, sīse katvānahaṁ tadā; Upasaṅkamma sambuddhaṁ, vessabhuṁ abhipūjayiṁ. Ekattiṁse ito kappe, yaṁ kammamakariṁ tadā; Duggatiṁ nābhijānāmi, buddhapūjāyidaṁ phalaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā kesarapupphiyo thero imā gāthāyo abhāsitthāti. Kesarapupphiyattherassāpadānaṁ catutthaṁ. Mandāravapupphiyavagga Aṅkolapupphiyattheraapadāna “Padumo nāma sambuddho, cittakūṭe vasī tadā; Disvāna taṁ ahaṁ buddhaṁ, sayambhuṁ aparājitaṁ. Aṅkolaṁ pupphitaṁ disvā, ocinitvānahaṁ tadā; Upagantvāna sambuddhaṁ, pūjayiṁ padumaṁ jinaṁ. Ekattiṁse ito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ.