Pasannacitto sumano, paramāya ca pītiyā; Ubho hatthehi paggayha, buddhassa abhiropayiṁ. Dvenavute ito kappe, yaṁ pupphamabhipūjayiṁ; Duggatiṁ nābhijānāmi, pupphapūjāyidaṁ phalaṁ. Ito tesattatikappe, eko āsiṁ mahīpati; Jotiyo nāma nāmena, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā mañjaripūjako thero imā gāthāyo abhāsitthāti. Mañjaripūjakattherassāpadānaṁ sattamaṁ. Thomakavagga Paṇṇadāyakattheraapadāna “Pabbate himavantamhi, vākacīradharo ahaṁ; Aloṇapaṇṇabhakkhomhi, niyamesu ca saṁvuto. Pātarāse anuppatte, siddhattho upagacchi maṁ; Tāhaṁ buddhassa pādāsiṁ, pasanno sehi pāṇibhi. Catunnavutito kappe, yaṁ paṇṇamadadiṁ tadā; Duggatiṁ nābhijānāmi, paṇṇadānassidaṁ phalaṁ.