Ekattiṁse ito kappe, yaṁ pūjamakariṁ tadā; Duggatiṁ nābhijānāmi, bodhipūjāyidaṁ phalaṁ. Ito chabbīsatikappe, ahuṁ meghabbhanāmako; Sattaratanasampanno, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā miñjavaṭaṁsakiyo thero imā gāthāyo abhāsitthāti. Miñjavaṭaṁsakiyattherassāpadānaṁ aṭṭhamaṁ. Ālambaṇadāyakavagga 9 Sukatāveḷiyattheraapadāna “Asito nāma nāmena, mālākāro ahaṁ tadā; Āveḷaṁ paggahetvāna, rañño dātuṁ vajāmahaṁ. Asampattomhi rājānaṁ, addasaṁ sikhināyakaṁ; Haṭṭho haṭṭhena cittena, buddhassa abhiropayiṁ. Ekattiṁse ito kappe, yaṁ pupphamabhipūjayiṁ; Duggatiṁ nābhijānāmi, buddhapūjāyidaṁ phalaṁ. Pañcavīse ito kappe, rājāhosiṁ mahabbalo; Vebhāro nāma nāmena, cakkavattī mahabbalo.