Itthaṁ sudaṁ āyasmā subhaddo thero imā gāthāyo abhāsitthāti. Subhaddattherassāpadānaṁ navamaṁ. Upālivagga Cundattheraapadāna “Siddhatthassa bhagavato, lokajeṭṭhassa tādino; Agghiyaṁ kārayitvāna, jātipupphehi chādayiṁ. Niṭṭhāpetvāna taṁ pupphaṁ, buddhassa upanāmayiṁ; Pupphāvasesaṁ paggayha, buddhassa abhiropayiṁ. Kañcanagghiyasaṅkāsaṁ, buddhaṁ lokagganāyakaṁ; Pasannacitto sumano, pupphagghiyamupānayiṁ. Vitiṇṇakaṅkho sambuddho, tiṇṇoghehi purakkhato; Bhikkhusaṅghe nisīditvā, imā gāthā abhāsatha. ‘Dibbagandhaṁ pavāyantaṁ, yo me pupphagghiyaṁ adā; Tamahaṁ kittayissāmi, suṇātha mama bhāsato. Ito cuto ayaṁ poso, devasaṅghapurakkhato; Jātipupphehi parikiṇṇo, devalokaṁ gamissati. Ubbiddhaṁ bhavanaṁ tassa, Sovaṇṇañca maṇīmayaṁ; Byamhaṁ pātubhavissati, Puññakammappabhāvitaṁ.