Ekattiṁse ito kappe, yaṁ dānamadadiṁ tadā; Duggatiṁ nābhijānāmi, bhojanassa idaṁ phalaṁ. Pañcavīse ito kappe, eko āsiṁ amittako; Sattaratanasampanno, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā bhojanadāyako thero imā gāthāyo abhāsitthāti. Bhojanadāyakattherassāpadānaṁ dutiyaṁ. Ārakkhadāyakavagga Gatasaññakattheraapadāna “Ākāseva padaṁ natthi, ambare anilañjase; Siddhatthaṁ jinamaddakkhiṁ, gacchantaṁ tidivaṅgaṇe. Anileneritaṁ disvā, sammāsambuddhacīvaraṁ; Vitti mamāhu tāvade, disvāna gamanaṁ muniṁ. Catunnavutito kappe, yaṁ saññamalabhiṁ tadā; Duggatiṁ nābhijānāmi, buddhasaññāyidaṁ phalaṁ. Paṭisambhidā catasso, …pe… kataṁ buddhassa sāsanaṁ”.