Nāgasamālo timiro, sudhāvaggena te dasa; Catuddasasatā gāthā, pañcapaññāsameva ca. Buddhavaggadasakaṁ. Paṭhamasatakaṁ samattaṁ. Bhikkhadāyivagga 1 Bhikkhadāyakattheraapadāna “Suvaṇṇavaṇṇaṁ sambuddhaṁ, Āhutīnaṁ paṭiggahaṁ; Pavarā abhinikkhantaṁ, Vanā nibbanamāgataṁ. Kaṭacchubhikkhaṁ pādāsiṁ, siddhatthassa mahesino; Paññāya upasantassa, mahāvīrassa tādino. Padenānupadāyantaṁ, nibbāpente mahājanaṁ; Uḷārā vitti me jātā, buddhe ādiccabandhune. Catunnavutito kappe, yaṁ dānamadadiṁ tadā; Duggatiṁ nābhijānāmi, bhikkhādānassidaṁ phalaṁ. Sattāsītimhito kappe, mahāreṇu sanāmakā; Sattaratanasampannā, sattete cakkavattino. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.