Tiṁsakappasahassamhi, yaṁ dānamadadiṁ tadā; Duggatiṁ nābhijānāmi, sabbadānassidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā sabbadāyako thero imā gāthāyo abhāsitthāti. Sabbadāyakattherassāpadānaṁ navamaṁ. Pilindavacchavagga Ajitattheraapadāna “Padumuttaro nāma jino, sabbadhammāna pāragū; Ajjhogāhetvā himavantaṁ, nisīdi lokanāyako. Nāhaṁ addakkhiṁ sambuddhaṁ, Napi saddaṁ suṇomahaṁ; Mama bhakkhaṁ gavesanto, Āhiṇḍāmi vane ahaṁ. Tatthaddassāsiṁ sambuddhaṁ, dvattiṁsavaralakkhaṇaṁ; Disvāna vittimāpajjiṁ, satto ko nāmayaṁ bhave.