Gharato nikkhamantassa, sayambhū aggapuggalo; Vīthiyaṁva ṭhito satthā, akā me anumodanaṁ. Pasannacitto sumano, yo me adāsi sāṭakaṁ; Tamahaṁ kittayissāmi, suṇotha mama bhāsato. ‘Tiṁsakappasahassāni, devaloke ramissati; Paññāsakkhattuṁ devindo, devarajjaṁ karissati. Devaloke vasantassa, puññakammasamaṅgino; Samantā yojanasataṁ, dussacchannaṁ bhavissati. Chattiṁsakkhattuṁ rājā ca, cakkavattī bhavissati; Padesarajjaṁ vipulaṁ, gaṇanāto asaṅkhiyaṁ. Bhave saṁsaramānassa, puññakammasamaṅgino; Manasā patthitaṁ sabbaṁ, nibbattissati tāvade. Koseyyakambaliyāni, khomakappāsikāni ca; Mahagghāni ca dussāni, paṭilacchatiyaṁ naro. Manasā patthitaṁ sabbaṁ, paṭilacchatiyaṁ naro; Ekadussassa vipākaṁ, anubhossati sabbadā. So pacchā pabbajitvāna, sukkamūlena codito; Gotamassa bhagavato, dhammaṁ sacchikarissati’. Aho me sukataṁ kammaṁ, sabbaññussa mahesino; Ekāhaṁ sāṭakaṁ datvā, pattomhi amataṁ padaṁ.