Kuṭajo bandhujīvī ca, koṭumbarikahatthiyo; Isimuggo ca bodhi ca, ekacintī tikaṇṇiko; Ekacārī tivaṇṭi ca, gāthā dvāsaṭṭhi kittitāti. Tamālapupphiyavagga Tamālapupphiyattheraapadāna “Cullāsītisahassāni, thambhā sovaṇṇayā ahū; Devalaṭṭhipaṭibhāgaṁ, vimānaṁ me sunimmitaṁ. Tamālapupphaṁ paggayha, vippasannena cetasā; Buddhassa abhiropayiṁ, sikhino lokabandhuno. Ekattiṁse ito kappe, yaṁ kammamakariṁ tadā; Duggatiṁ nābhijānāmi, buddhapūjāyidaṁ phalaṁ. Ito vīsatime kappe, candatittoti ekako; Sattaratanasampanno, cakkavattī mahabbalo. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.