Nābhijānāmi kāyena, vācāya uda cetasā; Saṁyatānaṁ tapassīnaṁ, kataṁ akkositaṁ mayā. Tena sucaritenāhaṁ, cittassa paṇidhīhi ca; Sabbesaṁ pūjito homi, anakkosassidaṁ phalaṁ. Ito ekādase kappe, sahassārosi khattiyo; Sattaratanasampanno, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā sumanāveḷiyo thero imā gāthāyo abhāsitthāti. Sumanāveḷiyattherassāpadānaṁ aṭṭhamaṁ. Umāpupphiyavagga 9 Pupphacchattiyattheraapadāna “Siddhatthassa bhagavato, lokajeṭṭhassa tādino; Saccaṁ pakāsayantassa, nibbāpentassa pāṇino. Jalajaṁ āharitvāna, satapattaṁ manoramaṁ; Pupphassa chattaṁ katvāna, buddhassa abhiropayiṁ.