“Devaloke ṭhito santo, vipassissa mahesino; Dhammaṁ suṇitvā mudito, imaṁ vācaṁ abhāsahaṁ. ‘Namo te purisājañña, namo te purisuttama; Bahujjanaṁ tārayasi, desento amataṁ padaṁ’. Ekanavutito kappe, yaṁ vācamabhaṇiṁ tadā; Duggatiṁ nābhijānāmi, thomanāya idaṁ phalaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā thomako thero imā gāthāyo abhāsitthāti. Thomakattherassāpadānaṁ paṭhamaṁ. Thomakavagga Ekāsanadāyakattheraapadāna “Vijahitvā devavaṇṇaṁ, sabhariyo idhāgamiṁ; Adhikāraṁ kattukāmo, buddhaseṭṭhassa sāsane. Devalo nāma nāmena, padumuttarasāvako; Tassa bhikkhā mayā dinnā, vippasannena cetasā.