“Sumedhaṁ bhagavantāhaṁ, lokajeṭṭhaṁ narāsabhaṁ; Vūpakaṭṭhaṁ viharantaṁ, addasaṁ lokanāyakaṁ. Upagantvāna sambuddhaṁ, sumedhaṁ lokanāyakaṁ; Añjaliṁ paggahetvāna, buddhaseṭṭhamayācahaṁ. Anukampa mahāvīra, lokajeṭṭha narāsabha; Padīpaṁ te padassāmi, rukkhamūlamhi jhāyato. Adhivāsesi so dhīro, sayambhū vadataṁ varo; Dumesu vinivijjhitvā, yantaṁ yojiyahaṁ tadā. Sahassavaṭṭiṁ pādāsiṁ, buddhassa lokabandhuno; Sattāhaṁ pajjalitvāna, dīpā vūpasamiṁsu me. Tena cittappasādena, cetanāpaṇidhīhi ca; Jahitvā mānusaṁ dehaṁ, vimānamupapajjahaṁ. Upapannassa devattaṁ, byamhaṁ āsi sunimmitaṁ; Samantato pajjalati, dīpadānassidaṁ phalaṁ. Samantā yojanasataṁ, virocesimahaṁ tadā; Sabbe deve abhibhomi, dīpadānassidaṁ phalaṁ.