Paṭisambhidā catasso, Vimokkhāpi ca aṭṭhime; Chaḷabhiññā sacchikatā, Kataṁ buddhassa sāsanaṁ”. Itthaṁ sudaṁ āyasmā sumaṅgalo thero imā gāthāyo abhāsitthāti. Sumaṅgalattherassāpadānaṁ dasamaṁ. Tassuddānaṁ Sīhāsanī ekathambhī, nando ca cūḷapanthako; Pilindarāhulo ceva, vaṅganto raṭṭhapālako. Sopāko maṅgalo ceva, daseva dutiye vagge; Satañca aṭṭhatiṁsa ca, gāthā cettha pakāsitā. Sīhāsaniyavaggo dutiyo. Subhūtivagga Subhūtittheraapadāna “Himavantassāvidūre, nisabho nāma pabbato; Assamo sukato mayhaṁ, paṇṇasālā sumāpitā. Kosiyo nāma nāmena, jaṭilo uggatāpano; Ekākiyo adutiyo, vasāmi nisabhe tadā. Phalaṁ mūlañca paṇṇañca, na bhuñjāmi ahaṁ tadā; Pavattaṁva supātāhaṁ, upajīvāmi tāvade.