Dūrato pana disvāna, hāso me udapajjatha; Añjaliṁ paggahetvāna, bhiyyo cittaṁ pasādayiṁ. Ekanavutito kappe, yaṁ saññamalabhiṁ tadā; Duggatiṁ nābhijānāmi, buddhasaññāyidaṁ phalaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā hāsajanako thero imā gāthāyo abhāsitthāti. Hāsajanakattherassāpadānaṁ tatiyaṁ. Umāpupphiyavagga Yaññasāmikattheraapadāna “Jātiyā sattavassohaṁ, ahosiṁ mantapāragū; Kulavattaṁ adhāresiṁ, yañño ussāhito mayā. Cullāsītisahassāni, pasū haññanti me tadā; Sārathambhupanītāni, yaññatthāya upaṭṭhitā. Ukkāmukhapahaṭṭhova, khadiraṅgārasannibho; Udayantova sūriyo, puṇṇamāyeva candimā. Siddhattho sabbasiddhattho, tilokamahito hito; Upagantvāna sambuddho, idaṁ vacanamabravi.