“Parinibbute bhagavati, atthadassīnaruttame; Chattātichattaṁ kāretvā, thūpamhi abhiropayiṁ. Kālena kālamāgantvā, namassiṁ lokanāyakaṁ; Pupphacchadanaṁ katvāna, chattamhi abhiropayiṁ. Sattarase kappasate, devarajjamakārayiṁ; Manussattaṁ na gacchāmi, thūpapūjāyidaṁ phalaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā atichattiyo thero imā gāthāyo abhāsitthāti. Atichattiyattherassāpadānaṁ paṭhamaṁ. Chattavagga Thambhāropakattheraapadāna “Nibbute lokanāthamhi, dhammadassīnarāsabhe; Āropesiṁ dhajatthambhaṁ, buddhaseṭṭhassa cetiye. Nisseṇiṁ māpayitvāna, thūpaseṭṭhaṁ samāruhiṁ; Jātipupphaṁ gahetvāna, thūpamhi abhiropayiṁ.