Itthaṁ sudaṁ āyasmā gatasaññako thero imā gāthāyo abhāsitthāti. Gatasaññakattherassāpadānaṁ tatiyaṁ. Ārakkhadāyakavagga Sattapadumiyattheraapadāna “Nadīkūle vasāmahaṁ, nesādo nāma brāhmaṇo; Satapattehi pupphehi, sammajjitvāna assamaṁ. Suvaṇṇavaṇṇaṁ sambuddhaṁ, Siddhatthaṁ lokanāyakaṁ; Disvā nabhena gacchantaṁ, Hāso me udapajjatha. Paccuggantvāna sambuddhaṁ, lokajeṭṭhaṁ narāsabhaṁ; Assamaṁ atināmetvā, jalajaggehi okiriṁ. Catunnavutito kappe, yaṁ pupphamabhiropayiṁ; Duggatiṁ nābhijānāmi, buddhapūjāyidaṁ phalaṁ. Ito te sattame kappe, caturo pādapāvarā; Sattaratanasampannā, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā sattapadumiyo thero imā gāthāyo abhāsitthāti. Sattapadumiyattherassāpadānaṁ catutthaṁ. Ārakkhadāyakavagga Pupphāsanadāyakattheraapadāna