Ekamantaṁ nisīditvā, brāhmaṇo mantapāragū; Buddhavedaṁ gavesanto, ñāṇe cittaṁ pasādayiṁ. Tattha cittaṁ pasādetvā, nisīdiṁ paṇṇasanthare; Pallaṅkaṁ ābhujitvāna, tattha kālaṅkato ahaṁ. Ekattiṁse ito kappe, yaṁ saññamalabhiṁ tadā; Duggatiṁ nābhijānāmi, ñāṇasaññāyidaṁ phalaṁ. Sattavīsatikappamhi, rājā siridharo ahu; Sattaratanasampanno, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā rahosaññako thero imā gāthāyo abhāsitthāti. Rahosaññakattherassāpadānaṁ pañcamaṁ. Sobhitavagga Campakapupphiyattheraapadāna “Kaṇikāraṁva jotantaṁ, nisinnaṁ pabbatantare; Obhāsentaṁ disā sabbā, osadhiṁ viya tārakaṁ. Tayo māṇavakā āsuṁ, sake sippe susikkhitā; Khāribhāraṁ gahetvāna, anventi mama pacchato.