Itthaṁ sudaṁ āyasmā kumudamāliyo thero imā gāthāyo abhāsitthāti. Kumudamāliyattherassāpadānaṁ paṭhamaṁ. Kumudavagga 2 Nisseṇidāyakattheraapadāna “Koṇḍaññassa bhagavato, lokajeṭṭhassa tādino; Ārohatthāya pāsādaṁ, nisseṇī kāritā mayā. Tena cittappasādena, anubhotvāna sampadā; Dhāremi antimaṁ dehaṁ, sammāsambuddhasāsane. Ekattiṁsamhi kappānaṁ, sahassamhi tayo ahuṁ; Sambahulā nāma rājāno, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā nisseṇidāyako thero imā gāthāyo abhāsitthāti. Nisseṇidāyakattherassāpadānaṁ dutiyaṁ. Kumudavagga 3 Rattipupphiyattheraapadāna “Migaluddo pure āsiṁ, araññe kānane ahaṁ; Vipassiṁ addasaṁ buddhaṁ, devadevaṁ narāsabhaṁ.