Soḷase kappasahasse, ito te caturo janā; Candābhā nāma nāmena, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā ekadīpiyo thero imā gāthāyo abhāsitthāti. Ekadīpiyattherassāpadānaṁ sattamaṁ. Navamaṁ bhāṇavāraṁ. Kumudavagga Maṇipūjakattheraapadāna “Orena himavantassa, nadikā sampavattatha; Tassā cānupakhettamhi, sayambhū vasate tadā. Maṇiṁ paggayha pallaṅkaṁ, sādhucittaṁ manoramaṁ; Pasannacitto sumano, buddhassa abhiropayiṁ. Catunnavutito kappe, yaṁ maṇiṁ abhiropayiṁ; Duggatiṁ nābhijānāmi, buddhapūjāyidaṁ phalaṁ. Ito ca dvādase kappe, sataraṁsīsanāmakā; Aṭṭha te āsuṁ rājāno, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”.