Disvā taṁ lokapajjotaṁ, vimalaṁ candasannibhaṁ; Avandiṁ satthuno pāde, vippasannena cetasā. Catunnavutito kappe, yaṁ adāsiṁ kusāṭakaṁ; Duggatiṁ nābhijānāmi, kusāṭakassidaṁ phalaṁ. Sattatiṁse ito kappe, eko āsiṁ janādhipo; Sunando nāma nāmena, cakkavattī mahabbalo. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā akkantasaññako thero imā gāthāyo abhāsitthāti. Akkantasaññakattherassāpadānaṁ aṭṭhamaṁ. Hatthivagga Sappidāyakattheraapadāna “Nisinno pāsādavare, nārīgaṇapurakkhato; Byādhitaṁ samaṇaṁ disvā, abhināmesahaṁ gharaṁ. Upaviṭṭhaṁ mahāvīraṁ, devadevaṁ narāsabhaṁ; Sappitelaṁ mayā dinnaṁ, siddhatthassa mahesino. Passaddhadarathaṁ disvā, vippasannamukhindriyaṁ; Vanditvā satthuno pāde, anusaṁsāvayiṁ pure.